ЦЕРКОВНЫЕ ТРАДИЦИИ

МОЛИТВОСЛОВИЯ ЗА ТРАПЕЗОЙ

(Окончание. Начало в №8)

МОЛИТВА НА БЛАГОСЛОВЕНИЕ ПАСХАЛЬНЫХ СНЕДЕЙ

(Молитва сия может быть прочитана иереем или старейшим из присутствующих на первой праздничной трапезе вместо обычной формулы благословения)

Господи Иисусе Христе Боже наш, по великой скорби Креста и страданий твоих радости безмерной тридневным воскресением всех исполнивый! Благодарим Тя, яко сподобил еси ныне и нас, поприще поста совершивших, достигнути святых сих дней и радости светлаго Твоего воскресения причастниками быти. Благодарим Тя, яко по милосердию Твоему и неизреченному снисхождению к немощем нашим утешаюши нас и трапезою праздничною в подкрепление и услаждение немощной плоти. Темже молим Тя, благослови сей пасхальный хлеб, млеко огустевшее, яица и прочия пасхальныя снеди, наипаче сии, от нихже, повинующеся Уставу Церкви, в мимошедшие дни поста воздерживались рабы Твои, да будут они вкушающим их со благодарением во здравие, в подкрепление сил телесных, в веселие и радость, да всякое довольство имуще, изобиловати будем и в дела благая, и от полноты благодарнаго сердца славити Тя, Воскресшаго, питающаго и утешающаго нас, купно же с Тобою и Безначальнаго Твоего Отца и Святаго Духа во веки веков. Аминь.

(читается на первой праздничной трапезе вместо обычной формулы благословения)

Господи Иисусе Христе Боже наш, изволивый спасения нашего ради на земли во плоти явитися и от Безневестныя и Пречистыя Девы Марии неизреченно родитися! Благодарим Тя, яко сподобил еси нас, подвигом поста предочистившихся, достигнути великаго праздника Твоего Рождества и в радости духовной со ангелами воспевати Тя, с пастырями славословити, с волхвами поклонятися. Благодарим Тя, яко по великому милосердию твоему и безмерному снисхождению к немощем нашим утешаюши нас ныне не точию изобильною пищею духовною, но и трапезою праздничной.

Темже молим Тя, отверзающаго щедрую руку Твою, исполняющаго все живущее благ Твоих, дающаго всем пищу, соответствующую времени и правилам церковным, благослови праздничныя снеди, верным людем твоим уготованныя, наипаче сия, от нихже повинующеся Уставу Церкви Твоея, в мимошедшии дни поста воздерживались рабы Твои, да будут оне вкушающим их со благодарением во здравие, в подкрепление сил телесных, в веселие и радость. Да вси мы, всякое довольство имуще, изобиловати будем и в дела благая, и от полноты благодарнаго сердца славити Тя, питающаго и утешающаго нас, купно же и Безначальнаго твоего Отца и Пресвятаго Духа во веки веков. Аминь.

(читается на первой праздничной трапезе вместо обычной формулы благословения)

О Пресвятая Госпоже наша, Дево Богородице, и по отшествии Твоем от земли людей православных не оставляющая, но присно милостями Своими посещающая, радости наша усугубляющая, скорби утоляющая! Благодарим Тя, яко и ныне даровала еси нам радость достигнути праздника честнаго Твоего Успения, утешитися торжеством церковным, усладитися пищею духовною – похвалами, во славу твою воспетыми. Веруем, Владычице, яко твоего ради ходатайства даровано нам и утешение телесное – трапеза праздничная. Моли убо, Пречистая, Твоего сына и Бога нашего, всех благ Дателя, да благословит Он праздничныя снеди, наипаче сия, от нихже, повинующеся Уставу Святой Церкви, православные люди воздерживались в мимошедшие дни поста, да будут оне вкушающим их со благодарением во здравие, в подкрепление сил телесных, в веселие и радость, да вси мы, всякое довольство телесное имуще, изобиловати будем и в дела благая, и от полноты благодарнаго сердца славити питающаго и не по грехом нашим милующаго нас Твоего Божественнаго Сына Христа Бога нашего, купно со безначальным Его Отцем и Святым Духом, и Тебе, нашей Матери Благодатной, Предстательнице, Помощнице и Утешительнице, вкупе со святыми апостолами молебно и благодарственно взывати: Пресвятая Богородице, помогай нам всегда, ныне и присно и во веки веков. Аминь.